Forpasis batalanto

Ni bedaŭras informi pri la forpaso de s-ro Francisco Mattos, ankaŭ nomata kiel Chico (Ŝiko). Laŭ informoj de lia edzino, s-ino Ana Koide, lia sanstato komplikiĝis, en la hospitalo mem, post sukcesa operacio, kiu forigis sublangan kanceron en komenca fazo. Li elkarniĝis en la aĝo de 82 jaroj la 28an de majo 2022. Omaĝe al li, eĉ se koncize, ni raportos pri lia vivo riĉa je faroj por la Esperanto-spiritista movado kaj por Esperanto mem.

Chico naskiĝis en Palma (MG), kaj loĝis en Braziljo, Brazilo, kie li fondis en la 90aj jaroj la Asocion Spiritisma Mondo (pt AME), kiu celis ekzemple disvastigi spiritismon inter Esperantistoj – kion ĝi faris ĉefe per sendo de Esperantlingvaj libroj al aliaj landoj.

Dum tri dekoj da jaroj li agadis ĉe Brazila Esperanto-Ligo – BEL jen kiel libroservisto jen kiel  estrarano.

Prave konsterniĝas la enkarnaj geamikoj kaj familianoj. Tamen, hosanas la ĉielanoj, kiuj lin bonvenigas nun en la spirita mondo, la vera patrujo.